د افغانستان اقتصادمحوره حکومتولي

دا کتاب په حقیقت کې دولت ته د اقتصادي برنامو (پروګرامونو) د عملي بېلګو وړاندې کوي، دا مهمه نده چې دولتي حاکمیت په چا پوري اړه لري او د کوم فکر خاوندان پر واک قابو دي، مګر دا مهمه ده چې دغه محتوا او منځپانګه د افغانستان او ددې وطن د وګړو په ژوند کې یو مثبت او تدریجي بدلون ته د مساعدیدو وسیله شي، نو دا را ټولې شوې طرحې د وطن لپاره دي او د دولتونو د مشروع اقتدار او ځواکمنتیا لپاره.
دلته پدې کتاب کې غالباً پر اقتصادمحوره حکومتوالۍ او پر هغو مؤلفاتو تمکېن شوی چې د اقتصادمحوره افغانستان حکومتي بېلګه ښکاره کوي، لکه: افغانستان د آسیا زړه په توګه د سیمه ييز اتصال او همپالنې په یوه عمده او بنسټیز شریک تبدیلول، د چین د اقتصادي لیدلوري بیابیا لوستل او د دوی له اقتصادي موډل ګټه اخیستنه (دوی بې وسلې او پرته له عسکرو ټوله نړۍ په خپل تولید تسخیر کړې، هغوی یو مختلط، د عامه او خصوصي سکټور مشترک اقتصادي موډل لري، دوی ډېرې سرحدي منازعي او شخړې له خپلو ګاونډیانو سره شاته اچولې او د ګډو ګټو تر چتر لاندې یې خپل پیوندونه سالم، دائم، خوندي او مصئون ساتلي او…)، د افغانستان شاړې ځمکې او معادن چې له پېړیو راهیسې بې استفادې دي او ددې خاوري انسان ترې مستفید نه دی، له پاکستان او نورو ګاونډویو سره د اړیکو بحث هم د اقتصادمحورۍ یو داسي رکن دی چې پدې کتاب کې پرې ځانګړی بحث شوی. د عامه دولتي او خصوصي سکټورونو ترمنځ د مشارکت موډل چې دلته نسبتاً په اجمالي توګه پرې بحث شوی، د افغانستان ټرانزیتي اعتبار او په سیمه ییز اقتصادي سازمانونو (سارک، ایکو، آسیازړه، شانګهای، ریکا او…) کې زموږ غړیتوبونه او هغه فرصتونه چې موږ ته یې راکولی شي او په نهایت کې د افغانستان د دایمي ثبات په تضمین بدلېږي.